کشن گنج 8/ دسمبر (پریس ریلیز) ساروگوڑا، ہالامالہ سے تعلق رکھنے والے بزرگ عالم دین مولانا عمیر انور قاسمی جو دارالعلوم دیوبند کے صد سالہ اجلاس میں ترانہئ دارالعلوم پڑھنے والے طلبہ میں سے ایک تھے، گذشتہ ۴/ دسمبر بروز پیر ان کا انتقال ہوچکا ہے، ان کے لیے ایصال ثواب اور تعزیت کا سلسلہ ہنوز جاری ہے۔ بیلوا کی جامع مسجد میں مجلس علمائے ملت اور مفتی اطہر جاوید قاسمی کی سرکردگی میں مولانا مرحوم کے لیے ایصال ثواب اور تعزیتی نشست کا انعقاد عمل میں آیا جس کی صدارت مولانا الیاس مخلص صدر مجلس احرار اسلام صوبہ بہار نے فرمائی، نشست کا آغاز تلاوت کلام اللہ اور نعتیہ کلام سے ہوا جس کے بعد شرکاء نے مولانا عمیر انور قاسمی رحمہ اللہ کے اوصاف حمیدہ کو یاد کیا.
مولانا الیاس مخلص،مفتی اطہر جاوید قاسمی، قاضی محمد ارشد قاسمی، مولانا شمیم ریاض ندوی، مولانا سہیل اختر ندوی، مولانا عبدالوکیل قاسمی، مولانا اظہار عالم، حافظ ذیشان، مولانا نور الزماں رحمانی، مولانا محمدساجد ندوی، مولانا آفتاب اظہرؔ صدیقی اور مولانا مرحوم کے فرزند محمد ظفر عالم نے مولانا مرحوم کے بارے میں اہم معلومات سے روشناس کرایا اور ان کی خوبیوں کا تذکرہ کیا، شرکاء نے بتایا کہ مولانا عمیر انور قاسمی حسن اخلاق اور تواضع کے پیکر تھے، بہت ملنسار اور خوش مزاج شخصیت کے حامل تھے، شاعری کے ساتھ مضمون نگاری میں بھی طبع آزمائی کرتے تھے؛ ان کی کئی کتابیں منظر عام پر آچکی ہیں۔ اللہ پاک مولانا مرحوم کو غریق رحمت فرمائے اور ان کے درجات بلند فرمائے۔آمین!
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
0 تبصرے